Պրիւքսելի Մէջ Եւրոպական Միութեան Ճգնաժամի Յաղթահարման <<Ճակատագրական>> Ժողով
Ֆրանսայի նախագահ Նիքոլա Սարքոզի Մարսէյի մէջ Եւրոպական աջակողմեան կուսակցութեանց ղեկավարներու հաւաքի մը ընթացքին զգուշացուց, որ Եւրոպայի համար «ապահամարկման վտանգը երբեք այսքան մեծ չէ եղած: Եւրոպա արտակարգ վտանգաւոր կացութիւն մը կը դիմագրաւէ»:
Ան նշեց, որ եւրոյի գօտիի անդամ երկիրները տակաւին որոշելու քանի մը շաբաթ ունին, սակայն ժամանակը անոնց դէմ կը գործէ:
Պրիւքսելի մէջ երէկ սկսաւ Եւրոպական Միութեան երկօրեայ վեհաժողովը, որուն ընթացքին պիտի քննարկուին եւրոյի գօտիի երկարատեւ ելեւմտական ճգնաժամը յաղթահարելու ուղիները: Փորձագէտներ վեհաժողովը եւրոյի գօտիի երկիրներուն համար «ճակատագրական» կը նկատեն:
Վեհաժողովին սկսելէն առաջ Սարքոզի եւ Գերմանիոյ վարչապետ Անկելա Մերքել մշակած են Եւրոպական Միութեան ելեւմտական համաձայնագիրները փոփոխութեան ենթարկելու իրենց առաջարկներու թղթածրարը, որպէսզի ամրագրուին ելեւմտական կարգապահութեան կանոնները:
Ըստ որոշ տեղեկութեանց, կրնայ ստորագրուիլ նոր համաձայնագիր մը, որուն պիտի միանան միայն եւրոյի գօտիի 17 անդամները եւ ոչ թէ Եւրոպական Միութեան 27 անդամները: Սակայն Իրլանտայի Եւրոպայի հարցերով նախարար Լուսինտա Քրէյթըն յայտնեց, որ «մենք ալ մեր կարմիր գիծերը ունինք: Պարզապէս երկուքը (Գերմանիա եւ Ֆրանսա) համաձայնած են ըսելով ասիկա կատարուած իրողութիւն մը կարելի չէ նկատել»:
Շուէտի, Ֆինլանտայի եւ Չեխիոյ նման երկիրներ եւս ֆրանս-գերմանական առաջարկին նկատմամբ վերապահութիւններ ունին: Փոքր պետութիւնները կը թուին աւելի ընդունելի նկատել Եւրոպական խորհուրդի նախագահ Հերման Վան Ռումփոյի Լիզպոնի ուխտի բարեփոխման առաջարկը, քան զայն ամբողջովին փոխելու ֆրանս-գերմանական առաջարկը:
| All the contents on this site are copyrighted ©. |